facebookLogo

YouTube 2

Instagram


Schnitzelbängg 2019


As mir so farbig umelaufe, jo das isch doch klar.
Hei eifach dänkt, so farbig si, das isch doch wunderbar.
Es laufe süscht jo au no rächt viel bunti Vögel umme,
Und bechömme au no Gäld drfür, die angere si die Dumme.
Mit schregä Frise, bunte Hor, bisch hüt uf Instagramm,
Drum hei mir gfarbti Chappä a und si ganz hip mit däm.
Und hinge hei Kaputze mir, das muess ganz eifach si.
Wenn'd öbbe fingsch mir sige cool, kheisch dört es Trinkgäld dri!
Mit fäzig buntem Guggesound, düe mir euch unterhalte.
Das isch doch eifach nume geil, für die Junge und die Alte.
Dä Groove dä isch doch wonderful, mir finde dä fantastic.
So super farbig powerfull, ganz eifach s'isch CHROMATIC!

*****

Als Polizischt do het mes schwer,
Treisch Uniform und au no Gwehr.
Und beides isch, me gsehts genau,
Zimlich schwarz, viellicht no grau.
Do hei sich d'Basler dänkt, he nei,
Es muess e neue Chare hei!
Sie hei bim Elon Musk, kei Seich,
7 Tesla gchauft äned em Teich.
Die si, das isch dr letschti Schrei,
So bunt grad wie ne Oschterei.
Mit dene chasch statt Gängschter jage,
A Cortége go als Waggis Waage!


*****

Z'Bärn do gits dr Bäregrabe,
Do kheie d'Lüt gärn Riebli abe.
Z'Fribourg gits dr Röschtigrabe,
Do goht bim Volk dr Lade abe.
Do hei die beide Basel dänkt,
So öbbis das wai mir nid gschänkt.
Mir hei jo schliesslich ganz legal,
E jede sis spezial Spital.
Do isch dr Grabe tief und breit,
Bisch froh as keine abekheit.
Süscht muesch du denn, do chönnt i wette,
Di Arsch am Änd no sälber rette!

*****

Bim FC Basel, s'isch kei Gmunkel,
Do isch es fanges au chli dunkel.
Die düe jetzt lieber anstatt spiele,
Mit Fuessballclubs in Indie deale.
Dört chönne sie statt Pünkt verwalte,
Sich über Kricket unterhalte.
Und spiele denn statt mit em Ball,
Am grosse Farbefestivall!

*****

Die meischte do, so isch halt d'Wält,
Die schwümme nid grad so im Gäld.
Me chert dr Franke zwoimol um
Und schafft sich au dr Rugge chrumm.
Do gits aber au, hesch's chönne läse,
Ungerstützig us em Chilchewäse.
S'git über Nacht Foifhundertdausig,
Dr heilig Geischt isch gar nid lausig.
Doch Hallelluia het me gsunge,
Mer het dr Schuldig doch no gfunge.
Do lauft doch eine ungeniert,
Mit riese Rucksack dur's Baselbiet.
Dr Präsidänt vo Grällige isch's,
Das säg ig euch, das isch kei Bschiss.
Är hofft, es het ihn niemer gseh,
Süsch isch's um sini Ferie gscheh!

 *****

Mitglied wärde...